Веднаш откако премиерот Зоран Заев најави дека во општина Гевгелија се утврдени најмалку 10 нови турски инвестиции во зоната на коридорот 10, локалната самоуправа најави дека експресно почнува со подготовка на индустриската зона „Прдејци“.
– Во оваа индустриска зона, која е лоцирана на само стотина метри од автопатот „Пријателство“ веќе стартувавме со изградба на комуналната инфраструктура и довод на електрична енергија,а паралелно со тие активности се изработува и студија за оправданост и нејзино ставање во функција како модел за привлекување, покрај странските и на домашни инвестиции кои ќе претставуваат постпандемиски поттик за развојот на локалната економија во општина Гевгелија -изјави градоначалникот на Општина Гевгелија, Сашо Поцков.
Oд Општина Валандово потврдија дека е при крај со процесот за создавање нова индустриска зона наменета за стопански објекти кои ќе се занимаваат исклучиво со производство, преработка, откуп и складирање на земјоделски производи.
