Во Црна Гора од недела се во сила нови мерки во борбата против корона вирусот, со кои се предвидува националниот дигитален сертификат за ковид да биде услов за влез во некои објекти.
Дигиталната ковид потврда е услов за влегување во деловни центри, деловни згради каде што работат повеќе од три деловни субјекти и продавници за храна, чија површина надминува 1.000 квадратни метри.
Сопствениците, корисниците и управителите на овие објекти се должни да контролираат и назначат лице одговорно за почитување на оваа мерка.
Новите мерки предвидуваат дека националниот дигитален ковид сертификат се издава веднаш по втората доза на вакцината и важи од тој момент, така што повеќе не треба да чекате 14 дена од целосната вакцинација, објави Министерството за здравство.
Мерките беа усвоени од Владата на Црна Гора и ќе бидат во сила следните две недели.
