Во Црквата „Св. Софија“, во рамките на Охридско лето, утревечер (22 јули), со почеток од 21 часот ќе настапи „Терем“ квартет во состав Андреј Константинов-сопран домбра и Андреј Смирнов – бајан/хармоника – двајцата Национални уметници на Русија, како и Алексеј Барсчев, алт домбра и Владимир Кудрјавчев, на контрабас.
„Основан во 1986 од страна на студенти од фолклорно-инструменталниот оддел на државниот конзерваториум ‘Николај Римски-Корсаков’ во Санкт Петербург, квартетот ‘Терем’ низ годините станува еден вид симбол на градот и амбасадор на Руската култура во светот. Според руската новинарска фела- Квартетот ‘Терем’ заедно со музејот ‘Ермитаж’, театарот ‘Марински’ и Рускиот музеј се главни претставници на културниот живот на Санкт Петербург. ‘Терем’ е своевиден руски феномен, уникатен ансамбл кој руската фолклорна музика ја издигнува до за неа непознати висини. Неверојатната виртуозност, исклучителна техничка подготвеност, неприкосновен стил на интерпретација и оригинални аранжмани го прават овој квартет единствен од ваков вид во Русија. Репертоарот се состои од повеќе од 500 композиции, оригинални транскрипции, парадоксални фантазии инспирирани од популарни теми од класичната и современа музика, како и фолклор, џез и музика од филм…“, стои во најавата за концертот.
