Италијанските истражители денеска разоткрија банда осомничена дека преку интернет продавала лажни ковид сертификати.
Експертите за кибер безбедност идентификуваа група Италијанци од повеќе градови, како и администратори на каналот Телеграм, кои на своите корисници им нуделе лажни сертификати за вакцинација против Ковид-19 за 100 евра, кои можеле да се платат и во криптовалути.
Купувачите, меѓутоа, никогаш не ги добиле тие потврди, изјави полицаец за ДПА.
Полицијата ја идентификуваше целата мрежа и пронајде бројни фотографии од лични и здравствени карти, како и историја на интернет комуникација и прегледи.
Според соопштението на полицијата, криминалната група имала поддршка од лица од здравствениот сектор.