Јубилејната 20. литературна манифестација „Илинден“ почна со стихови на Кочо Рацин во Домот на култура „Илинден“, а заврши во велелепниот амбиент на манастирскиот комплекс „Свети Ѓорѓија“ во Дељадровци, со стихови на Раде Силјан, Гане Тодоровски и Матеја Матевски, интерпретирани од Антонио Павловски.
На последниот дел од манифестацијата на писателите им беа презентирани знаменитостите на општина Илинден, а се заврши со дружба во манастирскиот комплекс „Свети Ѓорѓија“. Писателите, како што соопштија од општина Илинден, изразиле благодарност до локалната самоуправа и до градоначалникот Жика Стојановски.
На љубителите на литературата им се претставија над 70 писатели и поети од земјата и регионот, при што имаа можност да уживаат и во уметничките дела на нашиот истакнат сликар Стефан Хаџи Николов, како и песните на Драган Мијалковски и музиката на Пламенка Трајковска.
