Општина Гази Баба утре почнува со јавна презентација на студија која треба да го реши проблемот со сообраќајниот хаос во населбата Автокоманда.
– Подготвивме сообраќајна студија со која доаѓаме до решение на овој проблем преку воведување на еднонасочен сообраќај на улиците „Јани Лукровски“ и „Лазар Поп Трајков“. Со тоа ќе се олесни протокот на возила при влезот и излезот од населбата. Студијата дава предлози за нови паркиралишта во населбата, нова сообраќајна хоризонтална и вертикална сигнализација. Пешачките патеки ги ослободуваме од возила, а ја зголемуваме и безбедноста на граѓаните со воведување на ЗОНА 30 – вели градоначалникот на општина Гази Баба, Борис Георгиевски.
Тој вели дека овој предлог не е конечен и дека одлуката ќе ја донесат граѓаните од населбата Автокоманда, од каде веќе има предлози на социјалните мрежи.
– Наместо да правите еднонасочни улици, потрудете се да нема потреба да проаѓаат толку возила низ населбата. После 17 часот веќе нема гужва, размислете малку подобро што е проблемот, не само да им го комплицирате животот на жителите на населбата – вели Андреја Наумовски.
За Филип Трајковски, сообраќајниот хаос во Автокоманда го создава петелката која треба да се направи по принципот на детелинката на Бит-пазар, да се извадат семафорите и да се сменат правците.
– Треба да се изгради булеварот „Хрватска“ и да се реши проблемот на Автокоманда, а не да вртиме крукчиња за да дојдеме до дома. Најдобро е зонско паркирање, па да не ни се паркираат сите вработени од Алкалоид, ЈСП, Европа, Пивара – вели Снежана Павлова.
(С.Бл.)