Европскиот ракометен шампион Вардар, утре ќе ги почне подготовките за новата сезона. Прозивката во СЦ „Јане Сандански“ ќе ја изврши новиот тренер Давид Писонеро кој доаѓа на местото на неговиот сонародник Роберто Парондо.
Сезонава „црвено-црните” ќе бранат четири трофеи: во првенството на Македонија, Супер куп на Македонија, СЕХА Газпром лигата и во ЕХФ лигата на шампионите. Засилувања за сезоната 2019/2020 во Вардар се: Димитар Димитриоски, Павел Атман, Хозе Гиљермо Толедо, Сергеј Горпишин, Артурс Кугис и Домен Сикошек Пелко.
Според направениот план до 2 август ќе се тренира во Скопје каде ќе бидат завршени и сите потребни лекарски прегледи на играчите. Ќе се работи на подобрување на физичката подготвеност на играчите. На 2 август се заминува за Требиње, БиХ каде ќе продолжат со подготовки и ќе настапат на турнир на кој ќе играат и: Борац Бања Лука, Леотар, Металопластика, Бутан изола и Извиѓач.
Тој турнир ќе се игра во период од 9 до 11 август. По враќањето од БиХ ќе се работи во Скопје се до заминување за Саудиска Арабија на Супер Глоуб. Таму Вардар ќе настапи во периодот од 27 до 31 август.
На Супер Глоуб покрај Вардар ќе играат и: Ал Вехда (С.Арабија), Барселона (актуелен првак), Заламек (Египет), Сиднеј (Австралија), Таубате (Бразил), Њу Јорк (САД), Ал Мудхар (С.Арабија), Кил (Германија)
Ова ќе бидат последни натпревари пред официјалниот почетокот на СЕХА лигата и на групната фаза од ЕХФ Лигата на шампионите.
