Бугарскиот експерт Дијана Русинова од Европскиот центар за транспортни политики даде првична анализа за тешката сообраќајна несреќа што се случи рано утрово во Бугарија на патот Струма, во која загинаа 46 лица, а седум се тешко повредени. Анализата е заснована на снимки од дрон, на локацијата каде се случи страотната несреќа во која се запали македонски автобус кој што се враќал од Истанбул .
Русинова вели дека прво што треба да се направи е да се провери состојбата на ознаките на патот на оваа делница, но и неколку километри наназад, за да се види дали евентуално нивно отсуство го збунило возачот и не овозможило да го следи патот.
Експертот смета дека можно е знакот за постоење на сообраќаен остров да го немало или возачот да не го видел, или пак заспал.
-На фотографиите од дрон јасно се гледа како возачот се обидел да излезе од областа и да го стабилизира автобусот. Потоа следел удар во заштитната ограда-објаснува за бугарските медиуми Русинова и укажува дека е дискутабилна и положбата на знакот со кој се означува дека има двоење на коловозната лента.