Шефот на европската дипломатија, Жозеп Борел, синоќа во Брисел се состана со членовите на Претседателството на БиХ и ја поздрави нивната заедничка посветеност кон напредокот на земјата на патот кон евроинтеграциите.
На состанокот со бошњачките, српските и хрватските членови на Претседателството на БиХ, Шефик Џаферовиќ, Милорад Додик и Жељко Комшиќ, Борел исто така ја поздрави нивната посветеност да ги водат напорите за спроведување на 14-те приоритети дефинирани во Мислењето на Европската комисија за апликацијата на БиХ за членство во ЕУ, соопшти Европска служба за надворешни работи (ЕЕАС).
„Во врска со ова, Борел ги пофали неодамнешните важни одлуки на Босна и Херцеговина, кои овозможуваат локални избори во Мостар, усвојување на ревидирана Национална стратегија за воени злосторства, позитивни чекори кон целосно функционирање на парламентарниот комитет за стабилизација и асоцијација и напредок во усогласувањето на надворешната политика на земјата со заедничката надворешна и безбедносна политика на ЕУ“, се вели во соопштението.
Се додава дека Борел „во контекст на претстојните локални избори и пошироко, ги охрабри членовите на Претседателството на БиХ да градат атмосфера во која може да се постигнат единство и договор, преку намалување на политичките тензии и промовирање на помирувањето“.
Високиот претставник на ЕУ за надворешна политика и безбедност го охрабри Претседателството, како што се наведува, да остане посветено на спроведувањето на реформите што ќе и овозможат на земјата да напредува кон ЕУ.
„Тој исто така инсистираше на потребата властите да преземат одговорност за управување со ситуацијата со мигрантите“, се вели во соопштението.
Борел ја поздрави добрата соработка во борбата против пандемијата и „ја истакна важноста на позитивните регионални случувања“, се додава во соопштението.
„Европската комисија во октомври ќе претстави многу важен план за економија и инвестиции за поддршка на долгорочното закрепнување на Западен Балкан и приближувањето кон регионот на ЕУ“.
