Битката за Карпош, Центар, Чаир и Шуто Оризари ќе се води во вториот круг

211

Тимчо Муцунски и Александар Стојкоски од ВМРО-ДПМНЕ се новите градоначалници на скопските општини Аеродром и Ѓорче Петров. По првиот круг на Локалните избори, шест општини во главниот град добија градоначалници, а во другите четири ќе се оди во втор круг, истакна на прес конференција на Државната изборна комисија, претседателот Александар Даштевски.

Претходно, врз основа на веќе обработените податоци беше објавено дека нов градоначалник на Бутел е Дарко Костовски од ВМРО-ДПМНЕ, на Гази Баба неговиот сопартиец Бобан Стефановски, на Кисела Вода – Орце Ѓорѓиевски од истата партија, а во Сарај беше реизбран Блерим Беџети од ДУИ.

Во вториот круг ќе се води битка за Карпош, Центар, Чаир и за Шуто Оризари.

Во Карпош битката ќе се води меѓу Душко Весковски од СДСМ со 32,24 отсто од гласовите по првиот круг и Стевчо Јакимовски со 23,69 отсто гласови.

Во Центар во втор круг одат Горан Герасимовски од СДСМ со 40,24 отсто од гласовите и Наташа Котлар-Трајкова од ВМРО-ДПМНЕ и коалицијата со 33,27 отсто од гласовите во првиот круг.

Во Чаир за градоначалник во вториот круг ќе се тркаат Висар Ганиу од ДУИ – 48,87 и Беким Сали од АА/Алтернатива –  36,97 проценти од гласовите.

Втор круг ќе има и во Шуто Оризари, каде што Ферат Асан од СДСМ доби 37,07 отсто од гласовите пред Курто Дудуш од ЛДП/ДОМ со 25,38 отсто.