Дилемата дали се доволни мерките што вчера ги понудивме со шестиот пакет економски мерки за помош за справување со последиците од ковид кризата секогаш останува. Истата дилема ја имавме на почетокот на кризата, ја имаме и денеска, а веројатно и после година дена ќе зборуваме дали мерките се доволни затоа што е квалитативна и субјективна оценка, порача денеска вицепремиерот за економски прашања Фатмир Битиќи.
-Можеме да кажеме дека четирите пакети коишто Владата ги донесе минатата година покажаа дека ефектите се видливи кога знаете умешно да испланирате и таргетирано да ја дадете помошта. Ја завршивме 2020 година со пад од минус 4,5, а без помошта која што ја даде Владата падот би бил 8,7 проценти и тоа е суштинска разлика. Сме направиле ефект од 100 отсто од тоа што сме го дале, рече Битиќи во одговор на новинарско прашање по денешното потпишување договор за државна помош со германската компанија „Дрекселмајер“.
Според него, тоа е пример како би требало една Влада соодветно да постапи.
-Секако не можеме да се мериме со другите земји. Остануваме на фактот дека ги следиме состојбите, ќе ги поддржиме сите сектори коишто се погодени во одреден момент и ќе им помогнеме заедно да ја поминеме економската криза. Денеска покажуваме дека и во период на криза има компании коишто влегуваат во инвестициски циклус и ние воопшто не се колебаме дали тие треба да бидат поддржани. Ќе продолжиме уште повеќе да ги поддржуваме сите коишто сметаат дека заедно со вистински чекори можеме да излеземе од оваа криза, посочи Битиќи.
Потенцира дека има доволно средства за да се направи тоа ако се знае како успешно да се менаџираат парите на граѓаните.
