Компанијата АстраЗенека соопшти дека ја почитува одлуката на Германија да ја ограничи употребата на нејзината вакцината против коронавирус – но повтори дека други здравствени тела ја сметаат вакцината за безбедна.
– Ја почитуваме одлуката донесена од СТИКО [Постојаниот комитет за вакцинација] во нивниот советодавен капацитет за употреба на вакцини во Германија. Безбедноста на пациентот останува најголем приоритет на компанијата, изјави денеска претставник на британско-шведската фармацевтска компанија за агенцијата ДПА.
Компанијата додава дека истрагите на британските и европските регулатори за вакцини „не биле во можност да воспостават каузална врска меѓу вакцината и случаите на коагулација“.
АстраЗенека соопшти дека Европската агенција за лекови (ЕМА) во својот преглед утврдила дека нема поврзаност меѓу вакцината и згрутчување на крвта, но понатамошната анализа е „заслужена“.
– Регулаторните тела во Велика Британија, Европската унија и Светската здравствена организација заклучија дека придобивките од користењето на нашата вакцина за заштита на луѓето од овој смртоносен вирус значително ги надминуваат ризиците кај сите возрасни групи, соопшти компанијата.
– Профилот за ризик и корист од вакцината беше потврден во месечното ажурирање на безбедноста на вакцините од страна на ЕМА објавено вчера, додава компанијата.
Извор:МИА
