Американските сенатори гласаа со 61 наспрема 36 за да го заштитат правото на истополови и меѓурасни бракови.
За усвојување на законот гласаа и 12 републиканци.
Иако оваа регулатива летово беше изгласана во Претставничкиот дом, за неа ќе треба повторно да се гласа поради амандманите поднесени од републиканците, со кои се штитат и верските слободи, пренесува Voice of America.
„На нашата заедница навистина и треба победа, поминавме многу. Како омажена геј личност, во моментов се чувствувам олеснето. Знам дека моето семејство е безбедно“, рече Кели Робинсон, новата претседателка на Кампањата за човекови права, која се залага за ЛГБТК прашања.
Истополовите бракови во САД беа легализирани со одлука на Врховниот суд во 2015 година.
Но, откако Врховниот суд ја укина федералната заштита за правата на абортусот во јуни, а еден од конзервативните судии, Кларенс Томас, предложи да се преиспитаат другите одлуки засновани на правото на приватност, демократското мнозинство во Конгресот најави закон што ќе ги заштити истополови бракови, дури и во случај Врховниот суд да го одземе тоа право.
Меѓурасните бракови беа нелегални во САД до 1967 година, кога беа одобрени и од Врховниот суд.
Овој закон не ги обврзува сите држави да дозволуваат истополови и меѓурасни бракови, туку ги обврзува да ги признаат доколку се склучат во држави каде што се легални. Исто така, со овој закон се укинува регулативата од 1996 година, со која бракот се дефинира како заедница на маж и жена.
„Овој предлог-закон ги обединува Американците“, рече демократската сенаторка Тами Болдвин, која е првата отворено геј личност избрана во Сенатот на САД.
Републиканскиот сенатор Мајк Ли за време на дебатата рече дека овој закон е непотребен.
„Државите не го негираат признавањето на истополовите бракови. И не постои сериозен ризик некој да го загуби признанието“, рече тој.
Републиканците се фокусираа на фактот дека законот не ја споменува заштитата на верските слободи. Но, републиканската сенаторка Сузан Колинс рече дека загриженоста за верската слобода е лажен аргумент.
„Овој предлог-закон јасно ќе стави до знаење дека непрофитните верски организации и верските образовни институции не можат да бидат принудени да учествуваат или да поддржуваат бракови што се спротивни на нивните религиозни убедувања“, рече таа.
Во анкетата на Галуп во мај 2022 година, 71 процент од Американците изјавиле дека ги поддржуваат истополовите бракови. Само 27 отсто ги поддржаа кога анкетата за прв пат беше спроведена во 1996 година.
