Акцијата на ЈП „Водовод и канализација“ за отплата на долговите без пресметка на камата за задоцнето плаќање на сметките за вода е во тек и ќе трае заклучно до 31 март.
Оттаму појаснуваат дека корисниците што имаат заостанат долг во овој период можат да аплицираат за склучување на договори за отплата на долговите на најмногу 48 рати за физички лица и 24 рати за правни лица, во зависност од висината на долгот, без пресметка на камата за задоцнето плаќање.
Одлуката за спроведување на акцијата за отплата на заостанатите долгови без пресметка на камата не важи за органите на државната и локалната власт и другите државни органи основани согласно Уставот и со закон и институциите кои вршат дејности од јавен интерес. По истекот на овој период одлуката престанува да важи.
