Шпанија протера двајца вработени во американската амбасада

63

Шпанија дискретно протерала најмалку двајца вработени во американската амбасада обвинети дека подмитувале шпански разузнавачи во замена за државни тајни, објави во четвртокот весникот Ел Паис, цитирајќи владини извори.

Ниту една земја веднаш не го потврди протерувањето, но шпанската министерка за одбрана Маргарита Роблес, на прашањето за случајот, го омаловажи неговото значење за односите меѓу двете земји. Таа потврди дека во тек е судска истрага за „нередовно однесување“ во шпанската разузнавачка служба ЦНИ.

„Шпанија и Соединетите Американски Држави се пријатели, сојузници и партнери. Кога има потешкотии кои би можеле да нè погодат, тие се дискутираат и се работи на нив, но тоа во никој случај не влијае на односите што ги имаме“, изјави Роблс за новинарите.

Американски официјален претставник во Шпанија рече дека американската амбасадорка Јулиса Рејносо нема да го коментира инцидентот.

„Ел Паис“ пишува, без да именува имиња или функции, дека резултатите од истрагата покажале дека двајца шпански разузнавачи дале информации за „голема сума“.

Весникот додава дека можеби биле вмешани повеќе од двајца американски „шпиони“.

Службеникот на ЦНИ и неговиот помошник беа уапсени пред два месеци, а судот нареди нивниот случај да остане во тајност, пишува „Ел Паис“.

Шпанската влада соопшти дека е покрената истрага на барање на ЦНИ, но нема да даде повеќе детали бидејќи истрагата е тајна.

Шпанските власти ја повикале амбасадорката Рејносо на разговор и рекле дека таа не знае ништо за случајот и се извинила, додава весникот.

Вашингтон тогаш се согласи со барањето на шпанските министерства за одбрана и за надворешни работи двајца вработени во американската амбасада да ја напуштат земјата.

Портпаролите на шпанското Министерство за надворешни работи и на највисокиот суд одбија да го коментираат настанот, а ЦНИ не одговори на барањето за коментар, пренесува „24Сата“.