Црна Гора: Од понеделник стапува на сила законот за неработни недели

83

 Црногорската Управа за инспекциски работи соопшти денеска дека првата неработна недела за вработените во трговијата ќе биде 20 октомври и додаде дека казните за тие што ќе ги отворат продавниците ќе биде од 1.000 до 10.000 евра.

Како што е наведено, можно е и трајно затворање на објектите. Трговија на големо и мало, како што е пропишано со новиот закон, не може да се одвива в недела и на државни и други празници.

Законот прави исклучок само за аптеките, специјализираните продавници или трафики за продажба на леб, пекарски производи и колачи, како и за продавниците за цвеќе, сувенири, весници, средства за заштита на растенија, погребна опрема, бензински пумпи и продавници за трговија на мало во рамки на бензинските станици.

Предвидено е в недела да работат пазарите со тезги, витрини и автомати надвор од пазарите и подвижни продавници, како и објекти лоцирани во затворени места на автобуски и железнички станици, аеродроми и пристаништа.

Законот стапува на сила в понеделник, 14 октомври.