Само неколку часа подоцна, откако беше пласирана сензационалната информација за прекин на соработката, актуелниот шампион на Германија, тимот на Баерн (М), и официјално потврди дека ја раскинал соработката со својот досегашен тренер Јулијан Нагелсман, а за негов наследник е имануван Томас Тухел.
Нагелсман дојде во Баерн во лето 2021 година и веќе беше под силен притисок на крајот од минатата сезона по елиминацијата во 1/4 финалето од Лигата на шампиони од Вилјареал, но се спаси благодарение на освоениот трофеј во Бундес лигата.
- Кога го ангажиравме Нагелсман бевме уверени дека со него ќе соработуваме на долги патеки, бидејќи ја дели нашата визија за играње успешен и атрактивен фудбал. Меѓутоа, сега дојдовме до заклучок дека квалитетот на нашата екипа сè поретко доаѓа до израз. Особено лошо и неуспешно почнавме да играме по завршувањето на Светското првенство и тоа фрли сенка сомнеж на исполнување на нашите цели. Затоа делуваме сега, изјави извршниот директор на Баерн (М), Оливер Кан.
Тухел ќе дебитира на клупата на Баерн следниот викенд во можеби клучниот дуел во битката за титулата против Борусија од Дортмунд, која води на табелата со бод предност пред баварскиот клуб.
- Премиер лигата е исклучително силна лига, тоа е најголемиот предизвик во Европа. Но, Баерн (М) ќе се бореше за титулата во Премиер лигата благодарение на широчината и длабочината на тимот. Секако, го знам составот на Баерн, продолжив да гледам фудбал, бидејќи тоа ми го подобрува денот. Ова ми стана навика. Мора да почекате и да бидете трпеливи. Во вторникот првпат почнав да размислувам за составот на Баерн. Во Англија или во Париз за Баерн има исклучително високо мислење. Никој не сака да игра против Баерн. Статусот и моќта на клубот се непобитни, изјави Тухел.
Новиот предводник на Баерн (М) е без тренерски ангажман од септември лани кога доби отказ во Челзи, иако претходната сезона со лондонскиот клуб ја освои Лигата на шампиони.
