Почина хрватскиот продуцент и оскаровец Бранко Лустиг

127

Истакнатиот хрватски филмски продуцент Бранко Лустиг почина утрово на 88-годишна возраст во Загреб, пренесоа хрватските медиуми.

Тој е добитник на два Оскара за филмовите „Шиндлеровата листа“ во 1993 година и „Гладијатор“ во 2000 година.

„Мојот број е A3317. Долг е патот од Аушвиц до оваа сцена. Умрените ми оставија аманет ако преживеам да кажам како беше”, рече Лустиг откако ја доби Наградата на Академијата во 1993 година за најдобар продуцент за „Шиндлеровата листа“.

За време на неговата кариера, тој доби и голем број на значајни меѓународни признанија, на пример, во 2014 година, Претседателот на Франција му го додели Витешкиот Орден за уметност и литература, а беше рангиран и на 29-то место меѓу првите 50 филмски продуценти на сите времиња на почитуваниот магазин The Daily Beast истата година.