Нов модел на проценка на децата со попреченост, најави министерката Царовска

136

Во Центарот за функционална проценка и поддршка на деца и млади почна да се применува нов модел на проценка на децата со попреченост – МКФ, кој овозможува анализа на потенцијалот на детето и што тоа може да постигне, но и кои се пречките во средината кои му создаваат бариери, да го постигне својот целосен потенцијал.

– Овој Центар првпат во државава е воспоставен во старите простории на Домот „11 Октомври“. За првпат почнува функционална проценка на децата со атипичен развој или со одредени попречености, во насока на тоа што може да направат и како општеството треба да ги поддржи и што секоја институција треба да направи за тие да го постигнат максимумот од своите можности. Со тоа даваме можност за вистинска инклузија или вклучување на овие деца и лица во нашето општество – изјави министерката за труд и социјална политика, Мила Царовска при посетата на Центарот. 

Министерството за образование и наука, како што посочи Царовска, направи многу за ревизија на оние деца што беа во специјални училишта, сега веќе да одат во редовни преку овој тип на проценка.

Според министерот за образование и наука Арбер Адеми, инклузијата на децата со посебни образовни потреби е приоритет на Владата и на сите институции.

– Затоа преземавме храбри чекори, како што е донесувањето на новиот закон за основно образование и каде предвидовме конкретни чекори особено во делот на тоа дека од учебната 2022-2023 година сите деца ќе бидат запишани во редовни училишта – рече Адеми.

Заменик-министерот за здравство, Асим Муса посочи дека од почетокот интензивно се ангажираат за исполнување на својот дел со ангажирање на кадри и стручни лица во тимот, овие деца најнормално да се вклопат со останатите деца во општеството.

Британската амбасадорка во Северна Македонија Рејчел Галовеј, пак, вели дека цврстиот социјален сектор е витална работа за сите наши земји, како ги образуваме и како ги воспитуваме нашите деца да се вклопат во општеството, додавајќи дека Центарот ги поддржува и децата и нивните семејства.

– Сега е од пресудна важност сите чинители да сработуваат и да посветат напори кон јакнење на капацитетите и можностите за реализација на ваквите реформи во целата земја – рече Галовеј.

Според претставникот на УНИЦЕФ, Бенџамин Перкс, овој модел на работа е значаен поради тоа што родителите се вклучуваат во разговор со психолог, социјален работник, специјален едукатор, педијатар, и родителот е дел од рамноправно партнерство со овие стручни лица.

– Средината во која сето ова се одвива е пријатна и поволна за детето. Дискусијата се води околу тоа не што детето не може да прави туку што умее и што може да прави. Како ќе го живее својот живот во кој може да напредува, да го реализира својот потенцијал, со достоинство и исполнувајќи го целиот свој животен циклус. Нешто што сите ние посакуваме за нашите деца – додаде Перкс.

Фото: Н.Батев