Не ја охрабруваме Украина да напаѓа преку нејзините граници, тврдат САД

19

Соединетите американски држави не ја опремуваат ниту ја охрабруваат Украина да изврши напади преку нејзините граници, објави Стејт департментот, откако Украина со нападите врз руските воздушни бази покажа дека е способна да изврши акции на стотици километри длабоко на руска територија.

„Не ја опремуваме Украина да напаѓа преку границите. Не ја охрабруваме Украина да напаѓа преку нејзините граници“, рече портпаролот Нед Прајс. Тој додаде дека САД ја опремуваат Украина со она што и е потребно за одбрана на нејзината територија.

Киев не презеде директно одговорност за нападите, но ги поздрави. Прајс рече дека нема докази дека нападите ги извршила Украина.

Трет руски аеродром изгоре вчера по напад со беспилотно летало, еден ден откако Украина покажа очигледна нова способност да навлезе стотици километри длабоко во рускиот воздушен простор со напад на две руски воздушни бази.

Русија вчера објави дека беспилотни летала од советската ера ја погодиле воздухопловната база Енгелс, дом на руската флота од масивни стратешки бомбардери и база во Рјазан, на само неколку часа возење од Москва.