Поранешниот светски тениски рекет број еден Германецот Борис Бекер, се обиде да одговори на прашањето зошто тенисерите од помладата генерација сè уште не успеваат да освојат грен слем титула.
Светскиот тениски рекет број еден Србинот Новак Ѓоковиќ, триумфираше во Мелбурн и со тоа ја продолжи доминацијата на „големата тројка“ на најголемите натпреварувања. Ова беше 13. турнир во низа на кој триумфираше тој, Федерер или Надал. Србинот, Шпанецот и Швајцарецот заедно имаат освоено 56. грен слем титули.
За разлика од нив, Пит Сампрас, Бјорн Борг, Андре Агаси, Борис Бекер и Род Лејвер заедно имаат освоен 51 грен слем титула. Во конкуренција на „големата тројка“, само Енди Мареј, Стен Вавринка, Марин Чилиќ и Хуан Мартин дел Потро успеаја да освојат по некоја грен слем титула. Но, Александар Зверев, Стефанос Циципас, Данил Медведев, Карен Хачанов, Андреј Рубљов… и останатите од младата генерација сè уште не успеваат да освојат грен слем титула.
-Она што им недостасува на овие млади играчи за освојување на грен слем титула се ма*иња. На мојот јазик тоа се вели поинаку. Во стилот, во ред, тука сум, сакам да победам и да направам се што е потребно за тоа. Тие мислат дека сè е до тенисот. Но, не се работи за тенисот, туку за ставот. Се работи за тоа сè да ставите на линија во тие пет сетови. Им недостасува нешто што сè би променило. Нормално е да сакате да видите како младите ја победуваат големата тројка, изјави Бекер.
Германецот вели дека и критиките на сметка на младите играчи се сосема оправдани.
-Не сакам да го гледам Федерер на 45 години како освојува турнири против некој што е дупло помлад од него. Тоа е неприфатливо и ние мора да бидеме критични кон оваа млада група на тенисери со цел да ги разбудиме, вели Бекер.
Уште еден голем шампион, Американецот Џон Мекинро, вели дека тука има и друга страна од приказната.
-Гледате играчи како Надал, на него секој поен му е подеднакво важен. Ги гледам останатите играчи и не гледам дека имаат страст за секој поен. Овие тројца играчи се најголемите кои досега се појавиле и тоа е дел од проблемот, подобри се од сите останати. Тоа е она од што не може да се побегне, тие се неверојатни шампиони, заклучи Мекинро.
