Секоја личност која во својата историја на болеста има алергиска реакција од сериозен тип, како што е анафилактички шок, пред примање на вакцината против Ковид 19 треба да се обрати до својот лекар или специјалист.
Посебно имајќи во предвид дека произведувачите предвиделе да се применат мерки на претпазливост, односно, лицата кои имале историја на хиперсензитивност треба да се воздржат од вакцинација пред сè со вакцините на Синофарм и Спутник В, истакнал за порталот „Н1“ магистерот по фармација Павле Зелиќ од Агенцијата за лекови во Србија, одговарајќи на прашање дали вакцината против Ковид 19 е безбедна за лица алергични на пеницилин.
„Кога ќе се спомене алергиски односно реакција на хиперсензитивност на пеницилински антибиотици, морамо најпрво да истакнеме дека ниту една од четирите вакцини кои добиле дозвола од Агенцијата не ги содржат во својот состав овие супстанци. Со самото тоа, вакцината не може да предизвика такви симптоми кај личностите кои би ја примиле во смисла на директна реакција на активна супстанца, односно помошни супстанци на вакцината, нагласил соговорникот за порталот „Н1“.
Зелиќ напоменал дека секогаш треба да бидат подготвени соодветен медицински третман и надзор во случај на анафилактички појави после давање на вакцината, што е, како што рекол, процедура која се применува кај сите вакцини кои што се аплицираат.
Сличен став неодамна изнел и епидемиологот Владан Шапоњиќ, кој навел дека лицата кои имаат сериозни алергиски реакции во историјата „не би требало да ја примат кинеската и руската вакцина, но можат да ја примат вакцината на АстраЗенека и Фајзер“.
