Илија го егзекутираа на именденот!

92

За Иле, како што го викаат неговите соседи, сите имаа само убави зборови. Неколкупати досега бил во Авганистан, а последната мисија која не ја доврши ја почнал пред три месеци. На далечната и многу опасна печалба отишол со желба заработените пари да ги вложи во рибникот. За жал, неговата мисија беше прекината прерано и без никаква причина. Освен судбинска. Киднапирањето во Авганистан од страна на милитантските групи е голем безбедносен проблем, а освен локалното население, на мета најчесто им се и странци.

Некоја чудна тишина се беше надвила над скопско Љубанци. Мештаните со шепот ја пренесуваа веста дека 37-годишниот македонски државјанин, кој заедно со уште тројца странци беа киднапирани и убиени во авганистанскиот главен град Кабул, е всушност нивниот Иле. Локалните власти од Кабул веќе го потврдија идентитетот на загинатите, меѓу кои и Илија Мерџановски.
-Индиски, малезиски и македонски државјанин беа киднапирани и убиени. Ги пронајдовме нивните тела, изјави за Ројтерс, Хашмат Станеџаи, портпарол на шефот на полицијата во Кабул.

Според авганистанската полиција, македонскиот државјанин имал 37 години и патувал на работа со локален шофер. Заедно со неговите колеги биле киднапирани во периферијата на Кабул, а подоцна телата им се пронајдени во автомобил оставен во областа Мусаши.

Она што се уште дава лажна надеж е тоа што македонското Министерство за надворешни работи, вчера додека екипа на Вечер беше во посета на родното село на Мерџановски, не ја потврди информацијата, велат жителите на Љубанци.

– Дај боже да се потврди дека е неточно. Еве, први соседи сме, а немам сила да појдам да им пружам рака за сочувство. Ова е трагедија. Илија и неговиот брат се израснати без татко, еве сега и неговите две дечиња останаа без родител, вели за Вечер еден од жителите кој заедно со уште двајца соселани беа покрај селската чешма. Неверување и тага и покрај куќата на неговите блиски. Во дворот ширум беше отворена капијата, а пред влезната врата стоеја неколкумина облечени во црнина. Беше премногу болно да влеземе, па затоа се упативме кон рибникот на крајот од селото, каде што Илија планирал да продолжи со бизнисот кој го започнала пред три години.

И таму не пречека траорна тишина. Капијата пред познатиот ресторан беше затворена, а масите и столиците превртени. И кучето што се врткаше околу капијата не лаеше на странци. Истовремено и чудна и тажна атмосфера.

– Судбина деца, Илија си отиде баш на именденот. Му го одзедоа животот на Свети Илија. Сигурно тие туѓинци, безбожници и не знаат за овој свет празник, но ако има бог, ќе им плати што го убија на правдина, рече една повозрасна жена која ја сретнавме на заминување од селото во близина на селската продавница.

За Илија Мерџановски сите имаа само убави зборови. Неколкупати досега бил во Авганистан, а последната мисија која не ја доврши ја почнал пред три месеци. На далечната и многу опасна печалба отишол со желба заработените пари да ги вложи во рибникот.

Но, неговата мисија беше прекината прерано и без никаква причина. Освен судбинска.

Го познаваат сите. Велат, бил убаво и стројно момче, не многу зборлест, но вреден и културен, познат како многу вешт готвач. И рибниот ресторан заедно со рибникот кој го држел под наем, бил познат поради неговите специјалитети.

Заедно во смрт со Илија Мерџановски заминаа неговите колеги од Индија кој имал 39 години и еден малезиски граѓанин на 64-годишна возраст. Сите биле готвачи во познатата компанија за производство на храна и кетеринг „Содеко”.

Тие најпрво биле киднапирани од нивниот автомобил на пат за аеродром и убиени. За авганистанската полиција ова е терористички чин. До затворањето на весникот, ниту една терористичка група не прифати одговорност за нападот и за убиствата.

Биле застрелани во автомобилот, изјави Бахар Мех, официјален претставник во Министерството за внатрешни работи. Возачот на автомобилот бил испрашуван од полицијата и се третира како можен осомничен.

Компанијата го потврдила идентитетот на тројцата вработени и изразила “тага и шокираност” поради нивната смрт.

Министерството за надворешни работи на Македонија соопшти дека испратило барање за официјална информација до авганистанските институции во врска со веста дека македонски државјанин е киднапиран и убиен на територија на Авганистан.

Киднапирањето во Авганистан од страна на милитантските групи е голем безбедносен проблем, а освен локалното население, на мета најчесто им се и странци. (Е.А.)