Четворица градежни работници загинаа во експлозија на гасовод во близина на романскиот град Калиманести (округ Вранча), а петмина повредени се хоспитализирани, соопшти владината служба за итни случаи. И загинатите и повредените во пожарот вршеле градежни работи на градилиштето на автопатот.
Во средата пожарникари биле повикани на автопат во изградба во Калиманести поради експлозија на гасовод, проследена со пожар. Како резултат на инцидентот пет лица се повредени.
За жал, на самото место се пронајдени четири јагленосани трупови, изјави портпаролот на Инспекторатот за вонредни состојби во Вранча, Флорин Олару, пренесува „Аџерпрес“.
Тој прецизира дека пожарот бил изгаснат за околу три часа и се прават напори за разладување на машините зафатени од пожарот.
Двајца од повредените во експлозијата се здобиле со изгореници од 65, односно 40 отсто, а со хеликоптер биле пренесени во болница во Букурешт, соопшти медицинската служба во округот Вранча.
Според прелиминарната верзија, експлозијата се случила откако багер ненамерно удрил во крак од гасоводот за време на ноќната работа.
