Епидемијата на морбили опаѓа, за една недела само 11 заболени

Како што информираат од Министерството за здравство досега вакцинирани 32.653 лица на возраст до 14 години со МРП вакцина, остануваат уште 10.203 невакцинирани деца на  оваа возраст

49

Министерството за здравство информира дека вкупниот број вакцинирани лица на возраст до 14 години со МРП вакцина, од почетокот на епидемијата со морбили во целата држава изнесува 32.653. Од нив, 16.082 деца се вакцинирани на територија на град Скопје, додека пак, 16.571 дете е вакцинирано во останатиот дел од државата.

-Во текот минатата недела од шести јули до  дванаести јули пријавени се  вкупно 11 сомнителни случаи. Од нив, 10 случаи се класифицирани како мали сипаници, што покажува намалување од 30 проценти, во споредба со минатата недела. Од вкупниот број пријавени случаи, седум се од Скопје, а останатите тројца од Куманово-велат од ресорното министерство.

Според вакциналниот статус, девет од регистрираните случаи се невакцинирани, непотполно вакцинирани или со непознат вакцинален статус.

Од здравство потврдуваат дека оОваа недела не се регистрирани нови случаи на мали сипаници кај здравствени работници.

Анализите велат дека во целата држава остануваат уште 10.203 невакцинирани деца на возраст до 14 години.

-Потребно е да се засили спроведувањето на вакцинацијата, особено на предучилишните деца надвор од Скопје, каде од вкупно 19.494 невакцинирани, досега се вакцинирани само 11.130 деца-информираат од Министерството за здравство.

Инаку во извештајот на Европската Комисија се вели дека Министерството за здравство презеде чекори за контрола на ситуацијата со епидемијата, преку директна вакцинација во училиштата и детските градинки и со почнување голема кампања за вакцинација.

Вакцинацијата е единствената мерка за заштита од мали сипаници. Сите деца што се невакцинирани, за да се заштитат од заболувањето, треба веднаш да се вакцинираат.  (В.Ма.)