Најмалку 1.015 мигранти и бегалци кои загинале на границите на ЕУ во текот на изминатата деценија биле неидентификувани закопани во необележани гробови, пишува весникот „Гардијан“ повикувајќи се на наодите од заедничката истрага со конзорциумот новинари.
Тие лежат во остри, често необележани гробови долж границите – груби бели камења обраснати со плевел на гробиштата Сидиро во Грција; сурови дрвени крстови во Лампедуза во Италија; во северна Франција, безлични плочи едноставно означени како „Господин Х“; во Полска и Хрватска таблички со натпис „NN“ за непознато име.
На шпанскиот остров Гран Канарија, на еден гроб пишува: „Брод со мигранти број 4. 25.09.2022 година“.
„Гардијан“ наведува дека најмалку 2.162 тела сѐ уште не се идентификувани.
Весникот посочува дека, и покрај фактот што Европскиот парламент во 2021 година усвои резолуција со која се повикува на идентификација на лицата кои загинале на миграциските рути, многу малку е направено во овој поглед.
Со ова прашање главно се занимава финансиски ограничениот Меѓународен комитет на Црвениот крст (МКЦК), кој од 2013 година има регистрирано 16.500 барања за пронаоѓање исчезнати членови на семејството.
– Ако се бројат роднините на исчезнатите, стотици илјади луѓе беа погодени. Тие не знаат каде се нивните најблиски. Дали биле добро третирани? Дали биле почитувани кога биле погребани? Тоа е она што ги држи членовите на семејството зафатени – изјави координаторката за форензика во МКЦК за миграција во Европа, Лорел Клег.
Во меѓувреме, незакопаните тела на неидентификувани мажи, жени и деца мигранти се чуваат без надзор во мртовечници, погребални домови и контејнери за ладење низ ЕУ.
Ова прашање има и сериозни практични импликации, бидејќи без потврда за смрт, роднините на оние мигранти кои починале на пат можеби нема да можат да ги остварат родителските права, да наследат имот, да аплицираат за социјална помош или да бидат посвоени од други лица.
Според ОН, повеќе од 29.000 мигранти загинале на пат кон Европа од 2014 година.
Проблемот е „целосно запоставен“, според еврокомесарката за човекови права, Дуња Мијатовиќ, која рече дека земјите од ЕУ не ги исполнуваат своите обврски од меѓународното право за човекови права.
– Алатките се тука. Имаме агенции и форензичари, но тие треба да бидат ангажирани (од владата) – рече таа.
Подемот на цврстата десница и недостатокот на политичка волја веројатно дополнително ќе го попречат развојот на соодветен систем за решавање на „трагедијата на исчезнатите мигранти“, додаде таа.
