Сега веќе поранешниот селектор на грчката репрезентација, Димитрис Итудис, објави на социјалните мрежи порака со која се збогува од репрезентацијата.
Пораката ја започна потсетувајќи се како започнало целото искуство.
- Во март 2022 година, по поканата и честа што ми ја укажа претседателот на Федерацијата, г. Лиолиос, ја презедов функцијата селектор на грчката кошаркарска репрезентација. Отсекогаш сум сметал дека е чест да бидам повикан и обврска да ја преземам. За тоа време, дадов сè од себе за успех на нашата репрезентација. Без разлика на предизвиците со кои се соочи нашата репрезентација, верувам дека се боревме со сите сили да ја претставиме нашата земја со почит, борбеност и пожртвуваност – започна Итудис.
Потоа ги објасни причините поради кои се откажал од функцијата.
- Репрезентацијата, по неодамнешното Светско првенство, влегува во година во која успеа да се пласира на предолимпискиот турнир со цел да се пласира на Олимпијадата. Овој турнир ќе се одржи само неколку недели по завршувањето на обврските на екипите во Евролигата, вклучително и првенствата. Мојата мисла од моментот кога ја презедов репрезентацијата беше дека треба да биде обединета. Тоа е тим за сите Грци и ние имаме обврска да го ставиме над нашата лична волја и над нашите лични интереси. Во конкретниот случај, моја лична желба е да ја предводам нашата репрезентација на претстојниот предолимписки турнир. Сепак, обврските што ги имам кон мојот клуб Фенербахче, а што завршуваат само неколку недели пред почетокот на предолимпискиот турнир, не ми дозволуваат да бидам на располагање до степен до кој сметам дека налагаат подготовките за еден ваков важен турнир. Затоа, во договор со претседателот на Федерацијата, г. Лиолиос, решив да бидам со Федерацијата и со нашата репрезентација без никаков финансиски надоместок, само со мои совет и мислење во секое време, доколку е потребно – додаде Димитрис Итудис.
На крајот, сподели за емоциите предизвикани од сите, од навивачите, играчите и од персоналот.
- Во овој период од година и пол, ја почувствував прегратката, а и желбата на сите грчки навивачи, и тоа ме исполни повеќе од титулите што ги освоив на тимско ниво. Јас лично ја дадов последната капка од моите сили за достојно да ја претставам нашата земја, чувствувајќи се гордо и понизно во исто време и сфаќајќи колку сме мали поединечно во споредба со големината на претставувањето на државата и учеството во нашата репрезентација. Сакам да им се заблагодарам на сите играчи, тренери и на стручниот штаб, кои ѝ се ставија на располагање на репрезентацијата и на тренинзите и на натпреварите, како и на паневропските и на светските првенства. Прво сакам да им се заблагодарам на сите навивачи, кои ја сакаа и ја сакаат нашата репрезентација и чија љубов ја чувствуваме цело време. Ги молам да ја поддржат во напорите за пласман на Олимпијадата – заклучи искусниот тренер.
Итудис има две неуспешни првенства зад себе, резултатски и тренерски, бидејќи летово имаше сериозни разговори со некои играчи, кои беа исфрлени или не одговорија на поканата на репрезентацијата.
