Цените на оризот паднаа на светските пазари откако Индија ја укина забраната за извоз, а другите големи извозници го следеа примерот за да ги зачуваат пазарните удели. Во саботата Индија дозволи извоз на бел ориз, освен сортата басмати. Претходниот ден, Њу Делхи ја намали извозната давачка за бланширан ориз на 10 отсто, поттикната од неодамнешната нова жетва и повисоките залихи во државните магацини.
Забраната на Индија за извоз на бел ориз минатата година и воведувањето царини од 20 отсто за извозот на бланширан ориз ги доведоа цените на највисоко ниво во последните 15 години. Благодарение на овие индиски потези, конкурентните добавувачи како Виетнам, Тајланд, Пакистан и Мјанмар го зголемија својот удел на пазарот и диктираат повисоки цени на глобалниот пазар.
Во понеделникот цената на индискиот скршен бланширан ориз на берзите се движеше од 500 до 510 долари за метрички тон. Минатата недела беше од 530 до 536 долари. Индискиот скршен бел ориз се нудеше по цена од околу 490 долари. Во 2022 година, Индија учествуваше со повеќе од 40 отсто од светскиот извоз на ориз, со рекордни 22,2 милиони од вкупните 55,4 милиони метрички тони глобална трговија.
Поголемата понуда ќе им помогне на сиромашните азиски и африкански купувачи да ги обезбедат основните прехранбени производи по поприфатливи цени, велат извозниците. Купувачите и продавачите го проценуваат потенцијалното влијание на зголемените испораки на индиски ориз и ќе ги одредат цените оваа недела во согласност со новите услови, рече високиот потпретседател на Олам Агри Индија, Нитин Гупта.
Главните увозници на азиски ориз ги вклучуваат Филипините, Нигерија, Ирак, Сенегал, Индонезија и Малезија.
Реагираше и конкуренцијата, па извозниците од Виетнам, Пакистан, Тајланд и Мјанмар во понеделникот ги намалија цените за најмалку 10 долари за тон, велат трговците.
„Добавувачите од Тајланд, Виетнам и Пакистан одговорија на потегот на Индија со намалување на нивните извозни цени“, рече Химаншу Агарвал, извршен директор на Сатјам Балајеа, водечки извозник на ориз.
„Сите се обидуваат да останат конкурентни за да го задржат своето место на пазарот.
Цените на тајландскиот ориз во понеделникот се движеа од 540 до 550 долари, наспроти минатонеделните 550 до 560 долари за тон. Цените на извозот на тајландскиот ориз би можеле да паднат поради зголемените залихи на пазарот, но степенот на падот ќе зависи од неколку фактори, вклучително и зајакнувањето на тајландската валута, изјави почесниот претседател на Здружението на извозници на тајландски ориз, Чукјат Опасвонг.
Цените на оризот почнаа да се корегираат, дури и во Виетнам, но трговците предупредуваат дека целосното влијание на индиските пратки сè уште не може да се процени. „(Виетнамските) извозници треба да останат мирни и да не ги намалуваат цените за да обезбедат договори“, рече извршниот директор на извозникот на ориз Винарице Ко. Труонг Тан Таи.
