Во Основниот граѓански суд – Скопје, вчера, се одржа рочиште за тужбата за оштетното побарување на бизнисменот Орце Камчев од обвинетите Бојан Јовановски-Боки 13 и Катица Јанева во случајот „Рекет“.
На вчерашното рочиште, тужителот Камчев ја повлече тужбата против Зоран Милески-Кичеец, кој, покрај Јовановски и Јанева, беше еден од тужените од кои Камчев претходно бараше да му се исплати штетата.
На вчерашното рочиште прв исказ даде тужителот Орце Камчев, кој хронолошки ги образложи случувањата преку кои тој смета дека му е нанесена штетата.
– Средствата кои ми беа изнудени и кои ги барам како отштета, согласно и вештачењето што е доставено, се мои сопствени средства кои биле предавани преку други лица наведени во постапката, а за кои средства и во вештачењето е потврдено дека се пренесени од мојата трансакциска сметка и за кои средства е платен данок на Република Северна Македонија – истакна Камчев.
Тужениот Бојан Јовановски-Боки 13 во својот исказ истакна дека целосно го отфрла оштетеното побарување.
– Целосно го отфрлам оштетеното побарување од причина што во целост го негирам делото за кое сум правосилно осуден. Пред овој суд истакнувам, покрај тоа што го негирам делото и покрај правосилната пресуда, дека ќе дојде момент кога ќе се утврди вистинската фактичка состојба. Затоа испраќам апел преку овој суд и јавноста која е присутна на ова рочиште до највисокиот суд да овозможи повторување на постапката поради тоа што има многу недоречености и контрадикторности, кои, за жал, денеска претставуваат правосилни факти за чија пресуда денеска сме овде – истакна Јовановски.
Во случајот „Рекет“, Бојан Јовановски-Боки 13 доби затвор од девет години за делата примање награда за противзаконито влијание и за перење пари, додека Јанева е осудена на седум години затворска казна за злоупотреба на службената положба и овластување. Според обвинителниот акт, Бојан Јовановски влијаел врз Катица Јанева за таа да бара поблаги мерки против Јордан Камчев, обвинет во предметот „Империја“, случај кој го почна поранешното Специјално јавно обвинителство.
