АП: Малку е веројатно дека КФОР ќе го исполни барањето на Вучиќ да ја преземе безбедноста на северно Косово

2348

Американската новинска агенција Асошиејтед прес (АП) пишува дека е „малку веројатно“ КФОР да го исполни денешното барање на српскиот претседател Александар Вучиќ да ја преземе безбедноста на северот на Косово од „Полицијата на Аљбин Курти“, што Вучиќ го побарал утрово во разговор со претставници на Квинта во Белград.

Меѓутоа, пишува понатаму АП, „немаше итна реакција од НАТО на барањето на Вучиќ, но малку е веројатно дека ќе биде одобрено затоа што примарна улога на тие војници (4.500 војници на КФОР) е миротворна, а не полиција“.

АП пишува дека до сега „Вучиќ, проруски политичар, често зборувал против НАТО и неговата мировна мисија на Косово, обвинувајќи го за наводно незаштитување на малцинските Срби од малтретирање од страна на косовските Албанци“.

Агенцијата во написот забележува дека Вучиќ побарал од КФОР да се грижи за безбедноста на северот на Косово бидејќи во неделата „еден офицер и тројца вооружени напаѓачи беа убиени во еднодневна престрелка меѓу вооружените Срби и косовската полиција“, која беше „ еден од најлошите конфликти откако Косово прогласи независност од Србија во 2008 година“.

Тоа „насилство дополнително ги зголеми тензиите во балканскиот регион во време кога посредниците од Европската унија и САД бараат договор што би ги нормализирал врските меѓу поранешните воени непријатели на Србија и Косово“, пишува АП.

Агенцијата наведува дека Курти „ја обвини Владата на Србија за логистичка поддршка на „терористичка, криминална, професионална единица“ која пукаше во припадниците на косовската полиција“, а „Вучиќ ги отфрли тие обвинувања, велејќи дека вооружените луѓе биле локални косовски Срби“ кои повеќе не сакаат да го трпат теророт на Курти“.

АП пренесува дека по средбата со Вучиќ утринава, американскиот амбасадор во Србија, Кристофер Хил, на новинарите им рекол дека последниот случај на насилство е многу сериозен настан и дека „се разбира дека постои загриженост дека може да биде полошо“.

„Навистина длабоко жалиме за загубата на животи и искрено го осудуваме убиството на косовскиот полицаец“, рече Хил.

Тој посочи дека „многу е важно да се знае што се случило, но подеднакво е важно да се започне политички и дипломатски процес кој мислам дека навистина треба да се зајакне во деновите и месеците што следат“.

АП, исто така, пренесува дека Вучиќ на Инстаграм напишал дека сега е „еден од најтешките моменти за Србија“ и наведува дека „владата ја прогласи средата за ден на жалост поради „трагични настани“ – мислејќи на пукањето“.

Српска листа – „Партијата на косовските Срби која е во сојуз со Вучиќ“, пишува АП, „од вторникот прогласи тридневна жалост на северот на Косово каде доминира српското население, поради тројцата убиени српски напаѓачи“.

Косовскиот министер за внатрешни работи Џелал Свечља изјави денеска, според АП, дека „лидерот на српските вооружени напаѓачи кои го убија косовскиот полицаец, Милан Радоичиќ, е близок соработник на Вучиќ кој беше санкциониран од САД и Велика Британија поради наводни криминални активности“. .

„Радоичиќ, сомнителен бизнисмен, е заменик-претседател на партијата про-Вучиќ на косовските Срби, која отвори оган на северот на Косово“, додава АП, додавајќи дека косовскиот „министер исто така тврдел дека Радоичиќ бил ранет во пукањето и се лекува во болница во Белград“.